A Lagoa de Cospeito

Datas: Disponible dende o  21 de setembro  o 30 de novembro

Programa orientativo

  O Taller de Iniciación á Micoloxía na Carballeira de San Paio e na contorna da Lagoa de Cospeito e unha invitación a camiñar máis amodo, observar con atención e descubrir a natureza que nos rodea. Entre follas, musgo, madeira, prados e zonas húmidas iremos descubrindo pequenos tesouros que normalmente pasan desapercibidos.Porque detrás de cada cogomelo existe unha historia: unha relación coas árbores, co solo, coa humidade, cos animais e con todo o ecosistema.

 Non é necesario ter coñecementos previos nin experiencia na identificación de especies. Só é preciso traer curiosidade, ganas de camiñar e interese por descubrir o que se agocha baixo os nosos pés.

  ¿QUE SE PRETENDE CON ESTE TALLER?

 O principal obxectivo é aprender a observar e recoñecer os fungos que forman parte da paisaxe da  comarca, comprendendo o importante papel que desempeñan nos ecosistemas.

   A micoloxía non consiste simplemente en atopar cogomelos para saber se son comestibles. Os fungos forman unha parte esencial dos ecosistemas.

  Durante a actividade explicaremos como os fungos contribúen á descomposición da materia orgánica, devolvendo nutrientes ao solo e permitindo que continúe o ciclo natural da vida.

  Tamén coñeceremos a importancia das micorrizas, asociacións entre fungos e raíces das plantas que axudan ás árbores a obter auga e nutrientes e que, á súa vez, permiten aos fungos obter substancias necesarias para vivir.

   Durante o percorrido aprenderemos a diferenciar os principais tipos de cogomelos, observando as súas características máis importantes: forma, tamaño, cor, sombreiro, láminas ou poros, pé, textura, cheiro e lugar onde aparecen.

  Descubriremos que non todos os cogomelos teñen o mesmo aspecto nin viven nos mesmos lugares. Algúns aparecen nos prados; outros están asociados ás raíces dos carballos, castiñeiros, bidueiros ou piñeiros; e outros medran sobre madeira morta ou en zonas especialmente húmidas.

   Na Carballeira de San Paio localizaranse fungos propios dos bosques de frondosas, mentres que a contorna da Lagoa de Cospeito ofrecerá a oportunidade de observar a relación entre fungos, vexetación, solos húmidos e diferentes hábitats.

O taller pretende tamén transmitir unha idea fundamental: 

coñecer é o primeiro paso para respectar e conservar.

APRENDER A OBSERVAR

  Un dos grandes obxectivos da actividade será ensinar a mirar a natureza con outros ollos.

   Moitas veces camiñamos polo bosque sen reparar nos pequenos detalles. Despois deste taller, unha folla caída, un tronco cuberto de fungos ou un pequeno cogomelo no medio do musgo poden converterse nunha oportunidade para descubrir algo novo.

   Aprenderemos a buscar sen destruír, a observar sen arrancar innecesariamente e a respectar os exemplares que atopemos.

  Tamén veremos que unha mesma especie pode presentar diferentes aspectos dependendo da idade, da humidade ou das condicións ambientais, polo que a identificación require observar o conxunto das características e non só a cor ou a forma.

UNHA EXPERIENCIA PARA TODOS

   O taller está pensado para familias, adultos, persoas afeccionadas á natureza, visitantes da Lagoa de Cospeito e persoas que simplemente teñan curiosidade por coñecer o mundo dos cogomelos.

  Os máis pequenos poderán descubrir o bosque como un auténtico espazo de exploración. Poderán buscar formas, cores e texturas, aprender a respectar os seres vivos e comprender que existen moitos organismos que pasan desapercibidos.

  Para os adultos será unha oportunidade para ampliar coñecementos, aprender as bases da identificación e descubrir a riqueza micolóxica da Terra Chá.

  Non se trata dunha clase teórica convencional. Será unha actividade participativa e práctica, na que a observación directa terá un papel protagonista.

¿QUE LLE APORTA AO VISITANTE?

  O visitante levará consigo novos coñecementos, novas ferramentas para observar a natureza e unha maior conciencia sobre a importancia dos fungos.

   Aprenderá a recoñecer algunhas das especies máis características da zona, a distinguir diferentes hábitats e a comprender que función cumpre cada cogomelo dentro do ecosistema.

  Tamén levará unha aprendizaxe especialmente importante: non todos os cogomelos son comestibles e algunhas especies poden ser perigosas ou mesmo mortais. Por iso, explicaremos as normas básicas de seguridade e insistiremos en que nunca se debe consumir un cogomelo se non existe unha identificación absolutamente segura.

   O taller tamén será unha oportunidade para iniciarse na fotografía de natureza aplicada á micoloxía.

   Aprenderemos a fotografar os cogomelos respectando o seu contorno e buscando os detalles que axudan á súa identificación. Unha boa fotografía pode permitir observar posteriormente o sombreiro, as láminas, os poros, o pé e mesmo o ambiente no que se atopaba.

   A cámara ou o teléfono móbil poden converterse así nunha ferramenta para aprender e documentar a biodiversidade da Terra Chá.

¿QUE LEVAR?

Para gozar plenamente da actividade recoméndase levar:

• Roupa cómoda e axeitada para camiñar polo bosque.

• Calzado impermeable e con boa adherencia.

• Chubasqueiro ou roupa para a choiva segundo a meteoroloxía.

• Pequena lupa, se se dispón dela.

• Teléfono móbil ou cámara para fotografar.

• Auga.

• Moitas ganas de descubrir.